Түркістан облысында 78 млн түп көшет егілді

2021-2023 жылдары 51,6 мың гектар жерге, 78 млн түп көшет егіліп, жоспар орындалды, деп хабарлайды KAZ.NUR.KZ Түркістан облысы әкімдігінің ресми сайтына сілтеме жасап.

Әкімдіктің ресми сайтында хабарланғандай, Түркістан облысының орман қоры аумақтарына 2021-2025 жылдары 110 мың гектарға 170 млн көшеттерін егу бойынша Қазақстан Республикасы экология және табиғи ресурстар министрлігінің кешенді жоспары, елді мекендерге 1,5 млн көшет егу бойынша аймақтық жоспар келісіліп, бекітілген. Кешенді жоспарға сәйкес, 2021-2023 жылдары 51,6 мың гектар жерге, 78 млн түп көшет егіліп, жоспар орындалды. Қазір жұмыстар жүріп жатыр.

Биыл көктемде Түркістан облысында 500 мыңға жуық көшет егілді. Ал күзгі науқанға 515 935 дана көшет егу жоспарлануда. Жалпы облыс әкімі Дархан Сатыбалдының тапсырмасына сәйкес, облыстың елді мекендерін көгалдандырудың 2022-2024 жылдарға арналған іс-шара жоспары бекітілген. Статистикалық мәліметтерге сәйкес, 800-ден астам елді мекенді көгалдандыру үшін 4 миллионнан астам көшет отырғызу жоспарланып, жұмыстар атқарылуда.

Облыстық табиғи ресурстар және табиғат пайдалануды реттеу басқармасы мамандарының айтуынша, кей ағаштар көрші мемлекеттерден әкелініп отырғызылған.

"Сырттан әкелген ағаштардың бейімделіп өсіп кетуі қиынға соғады. Бірден жерсініп кетпейді, ол үшін арнайы күтім керек", - дейді мамандар.

Орман алқабына отырғызылатын ағаш түрлері алдымен сол жерге бейімдеу процесінен өтеді. Осы мақсатта өңірде заманауи тұқымбақтар ашылған. Бүгінде облыста 350 гектардағы 10 уақытша тұқымбақта 35 миллионнан астам ағаш көшеті өсіріліп жатыр. Алдағы уақытта көшеттер санын 50-60 миллионға жеткізу жоспарланып отыр.

Мәтіннен қате тапсаңыз, бізге жазыңыз