"ІІМ тарабынан қабылданған қате шешім болды": Аймағамбетов мектеп инспекторларын алып тастауға қатысты ойын айтты

Бұрынғы білім және ғылым министрі Асхат Аймағамбетов балалар омбудсмені Динара Зәкиеваның мектептерге кәмелетке толмағандар ісі жөніндегі инспекторларды қайтару керек деген ұсынысына пікір білдірді. Бұл туралы KAZ.NUR.KZ Аймағамбетовтың Telegram-дағы арнасына сілтеме жасап хабарлайды.

"Бұл ІІМ тарабынан қабылданған қате шешім болды. Мәселе бірнеше рет әртүрлі деңгейде көтеріліп, мектеп инспекторларын алып тастауға болмайтыны туралы айтылып жүрді.

Иә, сол кездің өзінде инспекторлар мектеп жанында жұмыс істеп жатса да, оларды түрлі іс-шаралар мен рейдтерге жиі тартып, негізгі міндеттерінен алаңдататын", - деді депуттат.

Аймағамбетовтың айтуынша, мектептерде инспектордың болуы нақты нәтиже берген. Бұрынғы министр мектеп инспекторларының жоқтығы мәселені одан әрі қиындатып отырғанын айтты.

"Мектеп пен инспекторлар арасындағы жұмыста қиындықтар болды, бірақ оларды басқаша жолмен шешуге болатын еді.

Инспекторлардың жұмысы жасөспірімдер арасындағы құқықбұзушылықтардың алдын алу мен қауіпсіздікті қамтамасыз етуге тікелей байланысты еді. Қазір мектеп инспекторларының жоқтығы бұл мәселелерді одан әрі ушықтырып отыр", - деді Асхат Аймағамбетов.

Айта кетейік, бүған дейін балалар омбудсмені Динара Зәкиева Қазақстан мектептерінде балалар арасындағы бұзақылыққа қатысты оқиғалар белең алғаны себепті әр мектепке инспекторларды қайтару керек екенін айтқан болатын.

Мәтіннен қате тапсаңыз, бізге жазыңыз