"Полиция хабарламаған": Ақтөбе тұрғыны суға батып кеткен ағасының денесін екі айдан кейін бауырластар зиратынан тапты

Ақтөбелік Жанат Иманғалиева туған ағасының өмірде жоқ екенін екі айдан соң ғана білген. Айтуынша, 51 жастағы ер адам суға батып көз жұмған. Екі ай мәйітханада жатқан адамның денесі бауырластар зиратына қойылған, деп хабарлайды KAZ.NUR.KZ тілшісі.

Ақтөбелік тұрғын Жанат Иманғалиева "ағамның денесін үйден шығара алмадым" деп өкінеді. Ол полицияға қайтыс болған бауыры туралы хабар бермей, жерлеп тастағанына наразы.

"Ағам 26 маусымда қайтыс болыпты. Оны 11 қыркүйекте Заречный ауданындағы полиция бөлімшесіне барғанымда естіртті. Оған дейін хабарсыз кеткен. Таныс, білетін адамдардан сұрастырсақ та хабар ала алмаған едік. 26 маусымда суға кетіп қайтыс болған екен. Мен қатты ашуландым. Екі жарым ай бойы неге хабар бермеген? Олар "үйіне бардық, ешкім болған жоқ" деп түсіндірді. Негізі үйге хабар айтып адам келмеді. Бұл қалай болды деп сұрағанымызда полицейлер ағамның Қарғалы өзеніне екі адаммен суға түсуге барғанын, сараптама оның бойынан 3 пайыз алкоголь анықтағанын, суға батып кеткенін айтты. Қасындағылар сол жерде полиция қызметкерлерін, құтқарушыларды шақырған. Үш сағаттан кейін шығарып, кейін мәйітханаға апарған. Денесінен зорлық-зомбылық белгілерін анықталмағанын айтты. Осы екі айдың ішінде учаскелік полиция не тергеуші бізге келген емес", - деді Жанат Иманғалиева.

Қарындасының айтуынша, ағасы Аман Жақаев 51 жаста, бөлек тұрған, ажырасқан. Телефон ұстамаған. Үнемі құрылыста жүрген, соның басында түнеген немесе Жалянкадағы саяжайына баратын дейді. Анасы мен қарындасы тұратын үйге он шақты күнде бір келіп тұрған.

"Оның өмірден өтіп кеткенін естігенімізде төбемізден жай түскендей болды. Туыс-тумаларын іздеместен, қаңғыбас адам секілді жерлеп тастаған. Полиция мойындап, кешірім сұрады. Ағамды бауырластар зиратына басына нөмір жазып, жерлеп тастаған. Журналдарына ағамның аты-жөнін Жақаев Аман Тыныштықұлы деп толық жазған. Біз полицияға 11 қыркүйекте бардық. Ал ағам 6 қыркүйекте жергенген. Бір аптаға кешігіп қалыппыз. Мен наразымын. Полиция департаментіне анамды ертіп бардым. Бізге ішкі тексеріс болады деп түсіндірді. Мен бұл жағдай бойынша прокуратураға да шағым түсіремін. Бауырластар зиратына қойылған ағамның басына құлыптасын қойып, айналасын қоршадық. Садақасын бердік", - дейді марқұмның қарындасы.

Ал Ақтөбе облыстық ПД өкілдері аталған жағдайға қатысты ішкі тексеріс жүретінен хабарлады.

"Аталған факті бойынша қызметтік тергеу жүргізіліп жатыр, нәтижелері бойынша шешім қабылданады", - деді облыстық ПД баспасөз қызметінің өкілі.