Қар аралас жаңбыр, көктайғақ: алдағы үш күнге арналған ауа райы болжамы жарияланды

Синоптиктер Қазақстан бойынша 22-24 қазанға арналған ауа райы болжамын ұсынды – еліміздің басым бөлігінде жауын-шашын, көктайғақ болады. Бұл туралы "Қазгидромет" РМК баспасөз қызметіне сілтеме жасаған KAZ.NUR.KZ хабарлайды.

Болжам бойынша, алдағы үш тәулікте Қазақстанның басым бөлігінде атлантикалық циклонның ықпалымен күн райы құбылмалы болады – жауын-шашын (жаңбыр, қар) түсіп, көктайғақ болады.

Батыс және оңтүстік өңірлерде жаңбыр жауады, жекелеген облыстарда күндіз найзағай ойнайды деп болжанады.

23 қазанда республиканың оңтүстік-шығысында қатты жаңбыр жауады, таулы аудандарда жауын-шашын (жаңбыр, қар) түседі.

24 қазанда Жетісу облысының тауларында қатты жауын-шашын (жаңбыр, қар) болады деп болжанып отыр.

Қазақстан бойынша жел күшейеді және тұман түседі.

Бұл ретте синоптиктер температура фонында күрт өзгерістер болмайтынын атап өтті.

Мәтіннен қате тапсаңыз, бізге жазыңыз