Түркістан облысында үйі өртеніп кеткен жалғызбасты анаға ауылдастары баспана салып берді

Түркістан облысы Келес ауданы Жүзімдік елді мекенінде жалғызбасты анаға ауылдастары үй салып берді. Бұл туралы KAZ.NUR.KZ Ontustik TV телеарнасының Youtube-тегі арнасына сілтеме жасап хабарлайды.

90 жастағы енесін бағып отырған жалғызбасты ана Ұлман Жораеваның үйі бір түнде өртеніп кеткен. Кейін ауыл азаматтары кеңес құрып, бірден іске кіріскен. Нәтижесінде, құр қабырғасы ғана қалған ескі үй 60 күн ішінде қайта түлеп, пайдалануға берілді.

Ауыл адамдарының сөзінше, Келес ауданында мұндай игі істер жиі ұйымдастырылады. Жығылғанға демеу болу олар үшін ерлік емес, қарапайым дағды екен.

"Түлкібас жақта тағы бір ағайындарымыздың үйі жаныпты. Ол жаққа да көмек беріліп жатыр. Осында жүрген азаматтар көмек қолын созып, ол үй де бітейін деп қалды", - деді мәслихат депутаты Ерлан Молдабаев.

Еске салайық, Түркістан облысы Сауран ауданында жастар ауылдағы мүгедектігі бар отбасына үй салып берген еді.