Шымкентте аяғы ауыр келіншектің жүрегі тоқтап қалды

Шымкентте дәрігерлер жүрегі тоқтап қалған жүкті әйелдің өмірін сақтап қалды. Келіншек шұғыл түрде №2 қалалық аурухананың перзентханасына жеткізілді, деп хабарлайды Денсаулық сақтау министрлігінің баспасөз қызметіне сілтеме жасаған KAZ.NUR.KZ.

Ведомствоның хабарлауынша, ол қатты қан кетумен, 3-дәрежелі геморрагиялық шок жағдайында келіп түсті.

"Операциялық үстелде оның жүрегі тоқтап қалды, бірақ құрамында анестезиологтар, акушер-гинекологтар, операциялық мейіргерлер, трансфузиологтар бар дәрігерлер тобы жүрек-өкпе реанимациясын сәтті жүргізді", - делінген ресми хабарламада.

Негізгі өмірлік функцияларын қалпына келтіргеннен кейін қан кетуді тоқтату операциясы жүргізілді. Дәрігерлер бригадасының үйлесімді және жоғары білікті іс-қимылдарының арқасында аяғы ауыр келіншектің өмірін сақтап қалды.

Бүгінгі таңда босанған әйел мен сәбидің жағдайы қанағаттанарлық және оларды үйге шығаруға дайындауда.

Мәтіннен қате тапсаңыз, бізге жазыңыз