Шымкентте белгісіз азаматтар тұрғындарға жылу берілуіне әдейі кедергі келтірген (видео)

Шымкенттегі "Тұран-2" шағынауданында белгісіз азаматтар тұрғындарға жылу берілуіне әдейі кедергі келтірген. Бұл туралы қала әкімі Ғабит Сыздықбеков Instagram-дағы парақшасында жазды, деп хабарлайды KAZ.NUR.KZ.

Ғабит Сыздықбековтың жазуынша, "Тұран-2" шағынауданындағы бірнеше үйдің тұрғындары жылудың жоқтығына шағымданған. Кейін "Куатжылуорталық-3" коммуналдық кәсіпорнының қызметкерлері зерделеу жұмысын жүргізген.

"Анықталғандай, белгісіз азаматтар бірнеше рет әдейі құдықтағы ысырмаларды жауып, подъездердегі апаттық су төгетін кранды ашық қалдырған. Құқықбұзушылар бұл әрекетімен тұрғындарға жылу берілуіне әдейі кедергі келтірген.

Бұдан бөлек, мамандар Абай атындағы саябақ арқылы өтетін магистральдық жылу желісіндегі ыстық суды төгуге арналған дренаждық кранның да қасақана ашылғанын анықтады",- деп жазды Сыздықбеков.

Сондай-ақ қала әкімі құқық қорғау органдары бұзақыларды анықтау үшін тергеу шараларын жүргізетінін, тұрғындарға қолайсыздық танытқан заңбұзушыларға қатаң шара қолданылатынын айтты.

"Барлық азаматтарды қалалық ортақ мүлікке ұқыптылықпен қарауға шақырамын. Сонымен қатар, осы секілді вандализм әрекеттері туралы бірден полицияға хабарлауларыңызды сұраймын!", - деп жазды Шымкент әкімі.

Айта кетейік, Шымкентте күн салқындауына байланысты жылыту маусымы 21 қазаннан басталған еді.

Посмотреть эту публикацию в Instagram

Публикация от Instagram

Мәтіннен қате тапсаңыз, бізге жазыңыз