Туризм министрлігі интернет-казинолардың "қара тізімін" жариялады

Ойын бизнесін және лотереяны реттеу комитеті ойын бизнесі саласында лицензиясы жоқ интернет-ресурстар тізімін жаңартты. Бұл туралы Туризм және спорт министрлігіне сілтеме жасаған KAZ.NUR.KZ хабарлайды.

Ведомствоның Telegram-дағы ресми арнасында жарияланған ақпарат бойынша, тізімге тыйым салынған интернет-казино белгілері бар 1820 бірегей желілік мекенжай енгізілген.

"Бұл тізім комитеттің жүйелі ақпарат жинап, интернет-казино мен заңсыз букмекерлік қызметтердің жұмысын анықтағаны нәтижесінде жасалды.

Сонымен қатар тізім Telegram және WhatsApp мессенджерлерінен толықтырылып отырады. Заңсыз ойын бизнесінің таралуына бей-жай қарамайтын азаматтар күдікті сайттар мен әлеуметтік желілердегі парақшалардың сілтемелерін жібереді", - деп түсіндірді министрлік өкілдері.

Тізімге Vavada, Sultan Games, Pin Up, Play Fortuna, Riobet, Casino-X секілді танымал платформалар да енгізілген.

Ведомство өкілдері анықталған ақпарат "Кибернадзор" ақпараттық жүйесіне енгізіліп, Қазақстан Республикасының аумағында олардың қызметін шектеу үшін заң тұрғысынан баға берілетінін атап өтті.

Мәтіннен қате тапсаңыз, бізге жазыңыз