Қар аралас жаңбыр, тұман, көктайғақ: алдағы үш күнге арналған ауа райы болжамы жарияланды

Синоптиктер 31 қазаннан 2 қарашаға дейінгі ауа райы болжамын ұсынды – Қазақстанның басым бөлігінде күн райы құбылмалы болады, қар аралас жаңбыр жауып, тұман түседі. Бұл туралы "Қазгидромет" РМК баспасөз қызметіне сілтеме жасаған KAZ.NUR.KZ хабарлайды.

Ауа райы болжамына сәйкес, Қазақстанның басым бөлігінде атлантикалық циклонның ықпалымен тұрақсыз ауа райы сақталады, жауын-шашын жаңбыр мен қар түрінде болады, көктайғақ пен тұман күтіледі.

1 қарашада республиканың батысында қатты жаңбыр жауады, еліміздің батысында, солтүстік-батысында және солтүстігінде жел күшейеді деп болжанып отыр.

Күндіз мына өңірлерде ауа температурасы жоғарылайды деп болжанды: батыста +12...+17°С, солтүстік-батыста және солтүстікте +7...+15°С, солтүстікте, шығыста және орталықта +4...+9°С, оңтүстікте және оңтүстік-шығыста +12...+17°С, ал таулы аймақтарда +3...+8°С.