Алматыда жаңбыр соңы қарға ұласуы мүмкін: әкімдік ауа райына байланысты ескерту жасады

Алматыда алдағы күндері қар жаууы мүмкін. Осыған байланысты әкімдік өкілдері жүргізушілерге ескерту жасап, қалада қауіпсіздік шаралары күшейтілгенін мәлімдеді. Бұл туралы ведомствоға сілтеме жасаған KAZ.NUR.KZ хабарлайды.

Әкімдіктің Telegram-дағы ресми арнасында жарияланған ақпарат бойынша, Алматыда 5-8 қараша аралығында жаңбыр, ал 7 қарашаға қараған түні қар аралас жаңбыр жауып, сынап бағанасы +2°C-қа дейін төмендейді.

"Су басу мен көктайғақтың алдын алу үшін 490 арнайы техника және 1120 жұмысшы жұмылдырылды. 6 қараша кештен бастап жолдарда 160 құмшашыратқыш кезекшілік етеді", - делінген ведомство хабарламасында.

"Қазгидрометтің" мәліметінше, 6 қарашада күн бұлтты болады, күндіз ауа температурасы +16°C болғанымен, жаңбыр жауады, түнде +8…+10°C.

7 қарашада жаңбыр соңы қарға ұласып, ауа температурасы +2°C- қа дейін төмендейді.

Осыған орай әкімдік өкілдері жүргізушілерді жазғы дөңгелекті қысқыға ауыстырып, көктайғаққа байланысты сақтық шараларын сақтауға, ал жаяу жүргіншілерді тайғақ тротуарларда абай болуға шақырды.

Мәтіннен қате тапсаңыз, бізге жазыңыз