ШҚО-да қар барысы камераға жақыннан түсіп қалды (видео)

Шығыс Қазақстан облысындағы "Катонқарағай" ұлттық саябағында тағы бір барыс камераға түсіп қалды. Бұл туралы KAZ.NUR.KZ Экология министрлігіне сілтеме жасап хабарлайды.

Катонқарағай мемлекеттік ұлттық табиғи паркінде тағы да қар барысы камераға түсірілді.

Сирек кездесетін жыртқышты Аршаты орманшылығында орнатылған фототұзақ түсіріп алған.

"Бұл жануар – күш пен еркіндіктің символы, парктің нағыз мақтанышы. Әрбір осындай кадр Катонқарағай ұлттық табиғи паркінің жануарларды қорғаудағы маңыздылығын еске салады", - делінген хабарламада.

Айта кетейік, қазан айының басында "Көлсай көлдері" ұлттық саябағында қар барысының ұрғашысы және оның бір жасар аланы фототұзаққа түсіп қалған еді.

Кейін Шарын ұлттық табиғи саябағында таутеке мен түлкі камераға түсіп қалғанын жаздық.