Астанада қалың қар жауды: билік өкілдері қала тұрғындары мен қонақтарға үндеу жасады (видео)

Астананы қалың қар басты. Осыған байланысты коммуналдық қызметтер тәулік бойы жұмыс істеп жатыр, әкімдік қала тұрғындары мен қонақтарын жолда абай болуға шақырады. Бұл жөнінде ведомствоға сілтеме жасаған KAZ.NUR.KZ хабарлайды.

Астана әкімдігінің Telegram-дағы ресми арнасында жарияланған ақпаратқа сәйкес, елордада жауын-шашынның көп болуына байланысты коммуналдық қызметтер тәулік бойы ауысымдық режимде жұмыс істеп жатыр. Түнгі ауысымда 1300-ден астам арнайы техника мен 300-ден астам жол жұмысшысы қар тазалауға шықты.

13 қарашада Астанадан 26 мың текше метрден астам қар шығарылды, бұл 2,1 мыңнан астам ауыр жүк көлеміне тең.

"Қыс мезгілінің басынан бері полигондарға 14,3 мың рейс, яғни 181 мың текше метрден астам қар шығарылды.

Ережелерге сәйкес, жолдарда кептеліс болмас үшін ең алдымен өте қарқынды қозғалыс аймақтары тазартылады. Сондай-ақ орташа қарқындылығы бар учаскелер-алаңдар, вокзал маңы аумақтары, тротуарлар, әлеуметтік нысандарға кірме жолдар және т. б. орындар қардан тазартылады.

Бірінші кезекте орталық көшелерде, жолаушылар көлігі маршруттарында, аялдамалар мен тротуарларда тазалау жұмыстары жүргізіліп жатыр", - делінген әкімдік хабарламасында.

Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылған, жарықтандыру қосылған.

"Қазгидромет" РМК мәліметінше, 14 қараша күндізгі уақытта Астанада күн бұлтты болады, қар жауып, боран соғады. Оңтүстік-батыстан соғатын жел екпіні 15-20 м/с болады.

"Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарлардан бас тартуды сұраймыз.

Төтенше жағдай туындаған кезде "112" телефонына хабарласыңыз", - дейді әкімдік өкілдері.