Қазақстанда апта ортасында жауын-шашын болады

Қазақстанда осы апта жауын-шашынсыз басталады, алайда апта ортасына қарай қар түсіп, жаңбыр жаууы мүмкін. Бұл туралы KAZ.NUR.KZ сайты "Қазгидромет" РМК баспасөз қызметіне сілтеме жасап хабарлайды.

Синоптиктердің болжауынша, аптаның бірінші жартысында ауа райы құбылмалы болады.

Алдағы үш тәулікте республиканың басым бөлігінің ауа райына ауқымды антициклон әсер етеді, сол себептен жауын-шашын болмайды.

"Тек батыста, оңтүстік-батыста және оңтүстіктің таулы аймақтарында, 28 қарашада күндіз еліміздің солтүстігінде және орталығында атмосфералық фронтальды бөлімдердің өтуімен жауын-шашын (жаңбыр, қар) және көктайғақ болжанады", - делінген хабарламада.

Республика бойынша тұман түсіп, жел күшейеді, еліміздің оңтүстігінде екпіні 23-28 м/с дейін жетеді деп болжанып отыр. Температура фонында күрт өзгеріс болмайды.