400 АЕК қайтарымсыз грант: Шымкентте көпбалалы ана кептірілген жеміс сатумен айналысып жүр

Шымкент қаласының тұрғыны Раушан Жантөреқызы биыл мемлекеттен 400 АЕК көлемінде қайтарымсыз грант алып, кептірілген жеміс сатуды бастады. Балаларының денсаулығына алаңдаған көпбалалы ана зиянды тағамдарды табиғи өнімдермен алмастыруды ойластырып, бұл шешімін кәсіпке айналдырған, деп хабарлайды қала әкімдігінің баспасөз қызметі.

Әкімдік мәліметінше, қала тұрғыны Enbek.kz порталы арқылы грантқа өтінім беріп, комиссия алдында жобасын сәтті қорғаған. Қаржыға 48 сөрелік кептіру құрылғысын сатып алып, отбасылық кәсібін бастаған.

Қазір Раушан өнімдерді әлеуметтік желілер арқылы сатуда. Кептірілген табиғи жемістер мен чипстерді балалар ғана емес, ересектер де иммунитетті нығайтатын дәруменге бай шай ретінде тұтынып жатыр.

Бүгінде табиғи өнімдерге сұраныс өте жоғары. Ал келіншек алдағы уақытта мемлекеттік қолдаулар арқылы кәсібін кеңейтіп, жаңа жұмыс орындарын ашуды жоспарлап отыр.