Шымкентте "Жас волонтер" жобасының үздіктері марапатталды

Шымкентте ішкі саясат және жастар істері жөніндегі басқарманың қолдауымен ұйымдастырылған "Жас волонтер" жобасының үздіктерін марапаттау рәсімі өтті. Бұл шараны "Шығармашыл жастар" қоғамдық қоры жүзеге асырды, деп хабарлайды Өңірлік коммуникация қызметі.

ӨКҚ Instagram-дағы мәліметіне сүйенсек, жобаға қаланың белсенді 14-35 жас аралығындағы жастары қатысқан. Олардың ұсынған жобалары 1 айдан аса уақыт қаралған. Шара жастарды волонтерлік қызметке тарту, олардың қоғам алдындағы әлеуметтік жауапкершілігін арттыруды мақсат еткен.

Жобаға 25 үміткер қатысып, он алты жоба ұсыныпты. Солардың ішінен медицина, экология, әлеуметтік қызметтер бойынша ұсынған 5 жоба үздік атанды. Жеңімпаздар ұсынған жобалардың қоғамға тигізер пайдасы мен тиімділігіне мән берілген.

Жеңімпаздар қоғамға пайдасы мен тиімділігі жоғары жобалары үшін марапатталып, жалпы сомасы 1 миллион теңгені құрайтын гранттарға ие болды. Бұл гранттар арқылы олар өз бастамаларын одан әрі дамыту мүмкіндігін алды.

Марапатталғандар қатарында Әбдімәлік Әбдінәбиев отбасымен бірге қарттарға көмек көрсетуге бағытталған жобасын ұсынды. Ал "Сәби үміті" қорының жетекшісі Жазира Тілеубергенқызы қан донорлығы мәселесін көтеріп, "Мен донормын" акциясын ұйымдастыруымен ерекшеленді.

"Медицинада қан жетіспеушілігі жиі кездеседі. Біз ел бойынша мүмкіндігі шектеулі балалар мен ауыр дертке шалдыққан науқастардың базасын құруды қолға алдық. Қажет кезде сол балаларға қан доноры болуға көмектесеміз. Бүгін жобамыздың жеңімпаз атануы біз үшін үлкен жетістік", - деді Жазира Тілеубергенқызы.

Ұйымдастырушылар волонтерлік қызметті әрі қарай дамытуға ерекше көңіл бөліп жатыр. Бұл жоба жастарды әлеуметтік белсенділікке тартып қана қоймай, олардың көшбасшылық қабілеттерін шыңдап, қоғамдағы рөлін арттыруға ықпал етеді.

Мәтіннен қате тапсаңыз, бізге жазыңыз