Шымкентте халық саны 10 айда 27 мың адамға көбейген

Қазақстанның Ұлттық статистика бюросы 1 қарашадағы жағдай бойынша елдегі халық саны туралы деректерді жариялады. Бюро мәліметінше, 1 қарашада Қазақстан халқының саны 20 243 981 адамға жеткен, деп хабарлайды Ontustiktv.kz.

Телеарна мәліметіне сүйенсек, 1 қаңтармен салыстырғанда қазақстандықтардың саны 210 139 адамға көбейген. Қазақстан қалаларында да халық саны өскен. Ең көп халық тұратын қала – Алматы, мұнда 1 қарашада 2 280 296 адам тұрған.

Ал одан кейінгі орында Астана тұр. Елордада қазір 1 511 807 адам тұрады.

Шымкентте 1 249 581 тұрғын тіркелген. Жыл басында 1 222 066 тұрғын болған. Яғни үшінші мегополис тұрғындарының саны 10 айда 27 мыңға көбейген. 

Түркістан облысында халық саны 2 154 461 адамға жетті. 1 қарашадағы жағдай бойынша қалаларда 12 727 404 қазақстандық тұрады. Ал ауыл тұрғындарының саны 7 516 577 адам.