Алдағы күндері Қазақстанда ауа райы қандай болады

Синоптиктер 12-14 желтоқсанға арналған ауа райы болжамын жариялады. "Қазгидромет" РМК мәліметінше, алдағы күндері елімізде ауа температурасы біртіндеп жоғарылайды. Бұл туралы KAZ.NUR.KZ хабарлайды.

Еліміздің басым бөлігінде ауа райына солтүстік циклонның жырасы ықпал етеді. Бұл тұрақсыз ауа райын тудырып, батыс аймақтарда қар жауып, бұрқасын және қатты жел соғады. 13 желтоқсанда оңтүстікте, ал 14 желтоқсанда оңтүстік-шығыста жаңбыр мен қар түріндегі жауын-шашын, сондай-ақ көктайғақ болады.

Түнде еліміздің батысында ғана 0...-8 градус аяз болады деп болжанады, қалған аймақтарда күн жылынады.

"Түнде солтүстік-батыста, солтүстікте -3...-10 градус аязға дейін, Қазақстанның орталығында -5...-13 градус аязға дейін, шығыста -10...-20 градус аязға дейін, республиканың оңтүстік-шығысында 0...-10 градус аязға дейін, оңтүстік облыстарда -8 градус аяздан 2 градус жылыға дейін жоғарылайды", - делінген хабарламада.

Бұған дейін синоптиктер 2024 жылғы желтоқсан айына арналған консультативтік ауа райы болжамын жариялағанын еске саламыз. Желтоқсанда Қазақстанның басым бөлігінде қар, боран және екпінді жел күтіледі, елдің оңтүстік жартысында жауын-шашын жаңбыр мен жылбысқы қар түрінде болады, таулы және тау бөктеріндегі аудандарда қатты қар жаууы мүмкін.