Алматыда бір тәулікте он күндік норма мөлшерінде қар жауды (фото)

15-16 желтоқсанда Алматы қаласында қалың қар жауды. Қалаға қардың желтоқсандағы бір айлық мөлшерінің үштен бірі немесе бір тәулікте он күннің нормасы түсті. Бұл туралы KAZ.NUR.KZ қала әкімдігінің баспасөз қызметі таратқан мәліметке сүйене отырып хабарлайды.

Алматы қаласына 22 см қар жауды. Ал Шымбұлақ, Каменск үстіртіне одан екі есе көп түсті.

Мегаполис әкімдігі өкілдерінің хабарлауынша, қазірдің өзінде қала көшелерінен 6,5 мың текше метр қар шығарылған. Қар тазалауға 600-ден аса арнайы техника мен 1080 жұмысшы жұмылдырылды. Олар тәулік бойы жұмыс істейді.

Әкімдік қаланы түнге дейін қардан тазартуды көздеп отыр.

"Бір тәулікте жауған қардың мөлшері он күндік нормаға жеткендіктен, қаланың негізгі магистраль көшелерін қардан тазарту түнде аяқталады", - деп хабарлайды Алматы қаласы әкімдігінің баспасөз қызметі.

Әкімдік қар шығару жұмыстарын ұйымдастыру мақсатында "тұрғындардан әсіресе түнде автокөлікті жол шетіне қоймауды сұрайды".