"Көбі таңырқай қарайды": жолаушыларды ретро көлікпен таситын петропавлдық жүргізуші туралы не білеміз (видео)

Қала тұрғыны Игорь Шешуринов жолаушыларды көненің көзіне айналған ескі "Волга" автокөлігімен тасиды. ХХ ғасырдың 60-жылдары шығарылған "темір тұлпар" әлі күнге дейін ешкімді жолда қалдырмай жүйткіп жүр. Бұл туралы KAZ.NUR.KZ 24.kz телеарнасына сілтеме жасай отырып хабарлайды.

Петропавл тұрғындары көне автокөлікті көшеде бірден таниды – кейбірі ретро-такси қызметін пайдаланған. Игорь Шешуринов жолаушыларды қазір сирек кездесетін ГАЗ-21 "Волга" автокөлігімен тасиды.

"Маған жолаушы тасыған ұнайды. Көбі оның әлі күнге дейін жүріп тұрғанына таңырқай қарайды. Жасы үлкен жолаушылар жастық шағын еске алады", - дейді Игорь Шешуринов.

"Волга" иесінен үлкен – 1965 жылғы. Бұрынғы кеңес заманында осындай көліктің 640 мың данасы шығарылған.

"Қарапайым көлік. Оңай жөнделеді. Сенімді. Жол талғамайды. Қанша көлік мініп көрдім, бұдан артығын көрмедім", - дейді таксиші.

Ретро-такси жүргізушісі алыс сапарға да жиі шығады. Соңғы рет Петропавлдан 840 км жердегі Екатеринбург қаласына (Ресей) барып келді.