Алматыда сот шешімімен екі көпқабатты үй сүріліп жатыр (фото)

Алматының "Нұр-Алатау" ықшамауданында сот шешімімен Қ.Тауасарұлы көшесінде орналасқан екі үш қабатты тұрғын үй бұзылып жатыр. Бұл туралы KAZ.NUR.KZ әкімдіктің баспасөз қызметіне сілтеме жасап хабарлайды.

Алматыда сот шешімімен екі тұрғын үйді бұзуға рұқсат етілді. Бүгін "Нұр-Алатау" ықшамауданындағы Қ.Тауасарұлы көшесі, 71/21 бойындағы бір учаскеде орналасқан үш қабатты үйлерді бұзу жұмыстары басталды, деп хабарлайды қала әкімдігі.

"Жоспардан тыс тексеру барысында рұқсат құжаттарының толық емес екені анықталды, нәтижесінде меншік иелеріне (жеке тұлғаларға) әкімшілік шара қолданылды.

Көп ұзамай басқарма Бостандық аудандық сотына нысандарды бұзу туралы талап арыз берді. 2023 жылдың 29 қыркүйегінде сот екі үйді бұзу туралы шешім қабылдады. 2024 жылғы 31 қаңтарда Алматы сотының қаулысымен аудандық соттың шешімі өзгеріссіз қалды.

Кейін сот шешімі әділет департаментіне келіп түсті, онда атқарушылық іс қозғалды", - делінген хабарламада.

Үйлердің бөлшектелуін меншік иелері сот орындаушыларының қатысуымен өз еркімен бастады. Әкімдіктің мәлімдеуінше, бұл нысандардың құрылысы заңға сәйкес жүргізілмеген.

Мәтіннен қате тапсаңыз, бізге жазыңыз