"Желі қолданушылардың құқығы бұзылды": комитет Қазақстандағы интернет ақауына қатысты пікір білдірді

Тұтынушылардың құқықтарын қорғау комитетінің өкілі жыл басынан бері 2000-нан астам қазақстандық интернеттің баяу істейтініне шағым айтқанын жеткізді. Мұндай деректерді ол Орталық коммуникациялар қызметі алаңында өткен брифингте мәлім етті, деп хабарлайды KAZ.NUR.KZ тілшісі.

14-16 желтоқсан күндері қазақстандық желі қолданушылары елде интернет жылдамдығы нашарлап, WhatsApp, Google, Tik-Tok, YouTube сияқты сервистердің дұрыс істемей қалғанын хабарлады. Бірі әлеуметтік желілерге кіру қиындап кететінін айтса, енді бірі Google іздеу жүйесін пайдалана алмай қалғанына шағымданды.

Тұтынушылардың құқықтарын қорғау комитеті төрағасының міндетін атқарушы Болат Танабергеновтың айтуынша, 2024 жылдың 11 айында тұтынушылардан 56 мыңға жуық шағым түскен.

"Өкінішке орай тұтынушылар бізге хабарласып, интернеттің баяу жасап тұрғанына шағымданды. Жыл басынан 2000-ға жуық халық ұялы байланыс ақауларына шағымданған. Оның ішінде интернет те бар. Тұтынушылардың құқықтарын қорғау туралы заңға сәйкес Интернет қолданушылардың құқықтары бұзылған. Біз өз тарапымыздан түскен шағымдар бойынша Қазақстан Республикасы Цифрлық даму, инновациялар және аэроғарыш өнеркәсібі министрлігіне хат жолдаймыз", - деп жауап берді журналист сұрағына Болат Танабергенов.