Шымкенттегі аудандардың бірінде 370 көше жарықтандырылды

Шымкенттегі Қаратау ауданында 370 көше жарықтандырылды. Бұл туралы KAZ.NUR.KZ қала әкімдігінің баспасөз қызметіне сілтеме жасап хабарлайды.

Әкімдік мәліметіне сүйенсек, биыл ауданда көшелерді жарықтандыру жұмыстары қарқынды жүргізілген. 2023 жылы аудан аумағында 30 көше жарықтандырылса, биыл 370 көшеге жарық жүйелері жүргізілді.

Сондай-ақ ауданда бір жылда 206 көшеге толығымен асфальт төселіп, тұрғындар өтінішіне сәйкес 19 орынға ирригациялық арық салынды. Жергілікті азаматтардың өтініші негізінде 21 аулаға балалар ойын алаңшасы орнатылып, 9 аулаға ашық спорт алаңдарының құрылысы жүргізілді.

Биыл 4 елдімекенді ауыз сумен және табиғи газбен қамту жұмыстары жүргізілді. "Халық қатысатын бюджет" жобасы аясында 8 демалыс орны салынып, тұрғындар игілігіне берілді.

Сонымен қатар 25 көпқабатты үйдің қасбеттері безендіріліп жарықтандырылды. Нұрсәт шағынауданы мен Нұрсәт тұрғын алабында орналасқан көпқабатты үйлерге түрлі тақырыпта 13 мурал салынды.

Мәтіннен қате тапсаңыз, бізге жазыңыз