"Болашақ" стипендиясы иегерлерлерінің тізімі жарияланды

Шетелде кадрлар даярлау жөніндегі Республикалық комиссияның шешімімен 271 қазақстандық халықаралық "Болашақ" стипендиясының иегері атанды. Бұл туралы KAZ.NUR.KZ Халықаралық бағдарламалар орталығының Telegram-дағы арнасына сілтеме жасап хабарлайды.

"Стипендия иегерлерінің 136-сы – магистратура, 8-і докторантурада оқиды. Сондай-ақ 127 азамат әлемнің ең үздік университеттері мен орталықтарында тағылымдамадан өтеді", - делінген хабарламада.

Сонымен қатар 170 азамат шетелдің жетекші ғылыми-зерттеу орталықтарында ғылыми тағылымдамадан өтуге стипендия алды.

Грант жеңімпаздарының толық тізімімен мына жерден көруге болады.

"Халықаралық бағдарламалар орталығы" ресми сайтындағы мәліметке сәйкес, 1993 жылы құрылған "Болашақ" бағдарламаның мақсаты – ел экономикасының басым секторлары үшін кадрлар мен мамандарды даярлау. Бағдарлама академиялық оқуды (магистратура, докторантура) және әлемнің жетекші компаниялары мен университеттерінде ғылыми-өндірістік тағылымдамадан өтуді қамтиды.

Қазақстан Республикасы Үкіметінің 2005 жылғы 4 сәуірдегі N 301 қаулысымен жарғылық капиталға мемлекеттің 100 пайыз қатысуымен "Халықаралық бағдарламалар орталығы" акционерлік қоғамы құрылды.

Қызметтің негізгі нысаны – кадрларды даярлау, қайта даярлау және олардың біліктілігін арттыру бойынша халықаралық бағдарламалар, соның ішінде Қазақстан Республикасы президентінің "Болашақ" халықаралық стипендиясы бойынша іс-шаралар кешенін жүзеге асыру.