Бакуден Ақтауға ұшып келген ұшақтан ақау шықты

Ақтау әуежайында Әзербайжан астанасынан келген ұшақтың шассиінде ақау шықты. Бұл туралы ҚР Көлік министрлігіне сілтеме жасап KAZ.NUR.KZ хабарлайды.

Министрлік мәліметінше, ұшақ қону жолағына сәтті қонғанымен, қону шассиінде ақау анықталған. Осыған байланысты әуежай мен жерүсті қызметтері ұшақты қону жолағынан сүйреп шығару жұмыстарын ұйымдастырды.

"Ұшақтың қонуы қалыпты жағдайда өтті. Оның бортында жолаушылар болған жоқ", - деп хабарлады министрлік.

Қазір Ақтау әуежайы штаттық режимде жұмыс істеп тұр. Бұл жайт рейстер кестесіне әсер етпеген.

Бакуден ұшқан тағы бір әзербайжандық ұшақ 25 желтоқсанда Ақтау маңында апатқа ұшырағанын еске саламыз.

Қазақстан Көлік министрлігі алдын ала ақпаратқа сәйкес ұшақ бортында 62 жолаушы мен 5 экипаж мүшесі болғанын хабарлады.

Бортта 42 Әзербайжан, 16 РФ, 6 Қазақстан, 3 Қырғызстан азаматы болған.

Көп ұзамай Ақтауда апатқа ұшыраған ұшақта 38 адам қаза тапқаны белгілі болды. Өкінішке қарай, аман қалғандардың арасында қазақстандықтар жоқ екені хабарланды.

26 желтоқсанда Euronews генттігі Әзербайжан үкіметіндегі дереккөзге сілтеме жасап, Ақтаудағы қайғылы оқиғаға Ресейдің Грозный үстінен ұшырылған зымыраны себеп болғаны туралы ақпарат жариялады.

Кейін Ресей авиациясының басшысы Дмитрий Ядров 25 желтоқсанда Embraer жолаушылар ұшағының Маңғыстауда апатқа ұшырауына қатысты мәлімдеме жасаған еді. Ол Қазақстанға құлаған жолаушы ұшағы Грозный әуежайына "Ковер" режиміне байланысты қона алмағанын, Шешенстан астанасы әуе кеңістігінде мұндай режим Украина шабуылына байланысты енгізілгенін мәлімдеді.

Мәтіннен қате тапсаңыз, бізге жазыңыз