Үстірт қорығында Қазақстанның кей аумағында ғана кездесетін жыртқыш фотоға түсіп қалды

"Қазақ орманы" серіктестігінің мәліметінше, Үстірт мемлекеттік табиғи қорығының ғылыми қызметкері А. Пулатов Қазақстанда өте сирек кездесетін жыртқыш — итаюды (Mellivora capensis) суретке түсірді. Бұл туралы KAZ.NUR.KZ хабарлайды.

Кәсіпорын мәліметінше, қорық қызметкерлерінің жұмысы арқасында итаю сияқты сирек кездесетін жануарлар туралы жаңа деректер анықталып жатыр. Құнды сурет Үстірт қорығының алуан түрлі тіршілік иесін сақтау ісінде маңызды рөл атқаратынын көрсетеді.

Итаю Оңтүстік және Оңтүстік-Батыс Үстіртте терең шатқалдарды, карстық қуыстарды, сайлар мен өсімдіктері әртүрлі учаскелерді, соның ішінде сексеуіл, баялыш және қараған өскен жерлерді мекендейді. Жыртқыш жануар негізінен ымырт пен түнде белсенді, бірақ қыста күндіз де жұрт көзіне түсуі мүмкін.

Итаю жылына бір рет көбейеді, ал суық күндерде қысқа мерзімді ұйқыға кетеді.