ТЖМ елдің кей өңірінде қар көшкіні қаупі барын ескертті

Төтенше жағдайлар министрлігі елдің кей өңірлерінде, атап айтқанда оңтүстігі мен оңтүстік-шығысындағы таулы аудандарда қар көшкіні қаупі барын ескертеді. Бұл туралы KAZ.NUR.KZ ведомствоға сілтеме жасап хабарлайды.

ТЖМ мәліметінше, қазіргі уақытта республиканың оңтүстігі мен оңтүстік-шығысындағы таулы аудандардың көпшілігінде қардың биіктігі орташа көпжылдық мәндерге жуық және шамалы жоғары.

"Қар көшкіні жағдайы тұрақты, Қазселденқорғау мамандарының бақылауында. ШҚО күрделі қар көшкіні жағдайы қалыптасуда", - делінген хабарламада.

ШҚО-да бүгінгі таңда қардың биіктігі нормадан 25 пайызға артық. Кей жерлерде қар жамылғысының максималды биіктігі 120 см. Сонымен қатар қар көшкіні жағдайына ауа температурасының жоғарылауы және қар бұрқасыны әсер ететіні мәлім етілді.

2024-2025 жылдардағы қысқы кезеңнің басынан бастап жалпы көлемі шамамен 6665 м3 болатын 15 профилактикалық қар көшкіні түсірілді.

Ведомство өкілдері тау шаңғышылары, туристер, альпинистер үшін аса қауіпті екенін ескертті.