Арктикалық суық: синоптиктер елімізде 40 градусқа дейін аяз болатынын ескертті

Синоптиктер алдағы күндері елімізде аяз күшейетінін ескертті. Кей өңірлерде ауа температурасы 40 градусқа дейін төмендеуі мүмкін, деп хабарлайды KAZ.NUR.KZ "Қазгидромет" РМК-ға сілтеме жасап.

Метеорологтардың мәліметінше, арктикалық суық ауа ағындары Қазақстан аумағына еніп, алдағы үш күнде температураның одан әрі төмендеуі күтіледі.

23-24 қаңтар күндері еліміздің шығыс және оңтүстік-шығыс өңірлеріне Солтүстік-Батыс циклонының жырасы әсерін сақтап қалады. Сондықтан бұл аймақтарда кей жерлерде қатты қар жаууы мүмкін. Ал қалған аумақта жауын-шашынсыз ашық ауа райы күтіліп отыр.

Бұдан бөлек, республика бойынша бұрқасын, екпінді жел тұрып, көктайғақ болып, тұман түсуі ықтимал.

Сондай-ақ синоптиктердің болжамынша, арктикалық суықтың әсерінен солтүстік өңірлерде түнде 20-30 градусқа дейін, кей жерлерде 35 градусқа дейін, күндіз 13-20 градусқа дейін қатты аяз болады.

Ал орталық пен шығыста түнде 20-35 градусқа дейін, кейбір аудандарда 40 градусқа дейін аяз болады деп күтілуде.

"Оңтүстікте түнде 15-25 градусқа дейін, кейбір жерлерде 28 градусқа дейін қатты аяз болады, күндіз 5 -15 градус шамасында аяз сақталады", - дейді мамандар.

Мәтіннен қате тапсаңыз, бізге жазыңыз