"Ақша туралы әңгіме болды": су және ирригация министрі Нұржан Нұржігітов Алтай Айнабекпен кездескенін айтты

Су ресурстары және ирригация министрі Нұржан Нұржігітов Аралды жаңбыр суымен толтыруды мақсат еткен Алтай Айнабекпен кездескен. Өз технологиясын таныстырған блогер министрліктен қаражат та сұраған, деп хабарлайды KAZ.NUR.KZ Jibek Joly телеарнасындағы "Уәде" бағдарламасына сілтеме жасап.

Министрдің айтуынша, ол 2023 жылдың желтоқсан айында блогер Алтай Айнабекпен кездесіп, оның ұсынған технологиясымен танысқан.

"Біріншіден, айтылған 2 млрд 600 млн текше метр су — арнайы гидропосттардан өткен су. Суды өлшейтін арнайы құралдар бар. Бірақ сол судың Аралға жетуі үшін оны реттеу қажет, дұрыс бөлу керек. Сондықтан бұл — нақты дерекке негізделген көрсеткіш", - деді министр.

Нұржан Нұржігітов кез келген жаңа технология немесе әдістеме ғылыми негізде дәлелденуі тиіс екенін айтады.

"Екіншіден, мен ол жігітпен таныспын (Алтай Айнабек - редактор еск.) 2023 жылдың желтоқсан айында ол менің қабылдауымда болды. Өз жобасын таныстырды. Сол кезде мен оған: "Бірінші өз әдісіңді көрсет, дәлелде", — деп айттым. Жұмыстар жүргізілгеннен кейін біз "ғалымдарды қосайық" дедік. Себебі әлеуметтік желіде "жаңбыр жауып жатыр, мен оны шақырдым" деп кез келген адам айта алады. Бірақ оны ғылыми түрде дәлелдеу керек. Сондықтан біз институттың ғалымдарын қосуға ұсыныс жасадық. Ғалымдар зерттеу жүргізсін дедік. Бірақ бұл жұмыс іске аспады. Ол қарсы болды деп айта алмаймын, бірақ бірге жұмыс істелмеді", - деді министр.

Алтай Айнабек жобасын таныстырғанда министрліктен қаражат та сұраған. Министр оның қанша ақша екенін айтты.

"Ақша туралы әңгіме болды. Бірақ біз бірінші кезекте ғылыми дәлелдемені талап еттік. Қазір нақты соманы есіме түсіре алмаймын, бірақ әңгіме 100-200 млн теңге көлеміндегі қаражат туралы болды", - деді Нұржан Нұржігітов.

Мәтіннен қате тапсаңыз, бізге жазыңыз