Алматының орталығындағы сауда павильоны бұзылды (фото)

Сот шешімі бойынша Алматының орталығындағы сауда павильоны бұзылды, деп хабарлайды KAZ.NUR.KZ Алматының қала құрылысын бақылау басқармасына сілтеме жасап.

Қала құрылысын бақылау басқармасының мәліметінше, Қалдаяқов көшесінің бойында орналасқан нысан заңсыз салынған деп танылған.

"Меншік иесі (жеке тұлға) нысанды қосымша рұқсат құжаттарынсыз тұрғызған және оның пайдалануға беру актісі болмаған. Басқарма ҚР ӘҚБтК-нің 323-бабы бойынша шаралар қабылдады және орын алған бұзушылықтарды жою туралы нұсқама берді.

Алайда нұсқама талаптары орындалмағандықтан басқарма осы объектіні бұзу туралы Алматы қаласының мамандандырылған ауданаралық экономикалық сотына (МАЭС) талап арыз берді", - делінген хабарламада.

Соттың 2025 жылғы 28 қаңтардағы шешімімен талап қанағаттандырылған.

Сот шешімін орындау үшін меншік иесі нысанды бұзу жұмыстарын жүргізген.

Айта кетейік, Алматы әкімі Ерболат Досаевтың құрылысты бақылауды күшейту жөніндегі тапсырмасы аясында 2023 жылдың басынан бері 66 заңсыз нысан, оның ішінде "Мечта", KHAN және басқа да тұрғын үй кешендері толығымен немесе ішінара бұзылған.

Мәтіннен қате тапсаңыз, бізге жазыңыз