"Наурыз жұмыскер" бағдарламасына кім қатыса алмайды: "Отбасы банктің" төрайымы жауап берді

"Отбасы банк" акционерлік қоғамының басқарма төрайымы Ләззат Ибрагимова "Наурыз жұмыскер" бағдарламасына кім қатыса алмайтынын айтты, деп хабарлайды Kazinform.

Ләззат Ибрагимованың айтуынша, "Наурыз жұмыскер" бағдарламасы бойынша жұмысшы мамандық иелерінен бөлек өтінім қабылданады.

Бұл бағдарламада бірінші кезекте тау-кен, қайта өңдеу, өнеркәсіп мамандығының жұмысшыларына басымдық беріледі.

"Сондай-ақ энергетика, көлік, ауыл шаруашылғы және су ресурстары мамандықтарына баса мән беріледі. Осыдан кейін өтінім берушінің шынымен жұмысшы мамандығының өкілі екенін анықтаймыз. Яғни, технолог, сынама алушы, жүргізуші деген сияқты кәсіп иелері болуы керек. Аталған салалардың ұйымдарындағы кеңсе менеджері, бухгалтер, PR-менеджер болып жұмыс істейтін адамдар "Наурыз жұмыскер" бағдарламасына қатыса алмайды", - деді Ләззат Ибрагимова сенатта өткенг парламенттік тыңдауда.

Сондай-ақ ол бағдарлама бойынша берілетін несиенің ең жоғары сомасын атады.

"Тексеруден кейін өтінім иесі пәтер таңдай алады. Астана, Алматы қалаларында ең жоғары сома 36 млн теңге болып белгіленді. Қалған өңірлердің облыс орталықтарында 30 млн теңге болады.

Сатып алынатын пәтерді шаршы метр мен бағасы нақты қойылған Baspana Market порталынан таңдап алу керек болады. Бұл аталған пәтердің бағасы өсіп кетпеу үшін жасалып отыр. Егер, мысалы, теміржолшы Астанадан 80-90 шақырым жерде тұратын болса, өзі тұратын моно қалада немесе аудан орталығында пәтер алғысы келсе, бірақ онда бастапқы баспана болмаса, қайталама нарықтан алуына рұқсат беріледі. Сондай-ақ пәтер әрленген болса, алғашқы жарнасы 10 пайызға дейін төмендетіледі", - деп түсіндірді Ләззат Ибрагимова.

Мәтіннен қате тапсаңыз, бізге жазыңыз