Алматыда шаңды дауыл тұрып, арты нөсерге ұласты (видео)

Бүгін Алматыда қолайсыз ауа райы болды - алдымен қатты жел соғып, кейін жаңбыр басталып, арты нөсерге ұласты. Бұған дейін синоптиктер дауылды ескерту жариялаған болатын, деп хабарлайды KAZ.NUR.KZ.

Kris_p_almaty Telegram-арнасында оқиға куәгерлері түсіріп алған видеолар жарияланды.

Видеоның бірінен қатты дауыл тұрғанын байқауға болса, енді бірінде "Ақкент" ықшамауданында қатты жел соғып жатқаны байқалады.

Айта кетейік, бір күн бұрын Алматы қаласы Төтенше жағдайлар департаменті дауылды ескертуге байланысты қала тұрғындары мен оңтүстік астананың қонақтарына үндеу жасаған болатын.

Құтқарушылар Алматыда 5 сәуірде қатты жаңбыр жауып, найзағай ойнап, шығыстан қатты жел соғатынын, найзағай кезінде жел екпіні секундына 15-20 метрге жететінін ескерткен еді.

Сондай-ақ, 5-7 сәуір аралығында Қазақстанның басым бөлігінде тұрақсыз ауа райы сақталады деген болжам жасалып отыр - өңірлерде жаңбыр жауып, найзағай жарқылдайды.