Екібастұз Төтенше жағдайлар басқармасының бастығына сот үкімі шықты

Екібастұз қаласы Төтенше жағдайлар басқармасының бастығына сот үкімі шықты, деп хабарлайды Сыбайлас жемқорлыққа қарсы іс-қимыл агенттігіне сілтеме жасаған KAZ.NUR.KZ.

"Биыл 31 наурызда Павлодар облысында Екібастұз қалалық соты Екібастұз қаласы Төтенше жағдайлар басқармасының бастығы Д. Куконевке, оның орынбасары Ж. Маймановқа және кәсіпкер Б. Жұмашевке қатысты үкім шығарды.

Куконев пен Майманов Жұмашевтен өз кәсіпорнымен мемлекеттік емес өртке қарсы қызмет көрсету шарттарын жасасқаны үшін бірнеше рет жалпы сомасы 7,4 млн теңгені құрайтын пара алғанына кінәлі деп танылды", - делінген Антикор таратқан хабарламада.

Сот үкімімен Куконев 7 жыл 6 айға, Майманов пен Жұмашев әрқайсысы 7 жылға бас бостандығынан айырылған.

Сондай-ақ олар өмір бойы мемлекеттік қызметте және квазимемлекеттік секторда қызмет атқару құқығынан айырылған.

Сонымен қатар Куконев "азаматтық қорғаныс полковнигі", Майманов "азаматтық қорғаныс майоры" арнайы атағынан айырылған.

Сот актісі заңды күшіне енбеген.