"10 сәуірге дейін жүргізуші куәлігін ауыстыру керек": ІІМ өкілдері желіде тараған ақпаратты жоққа шығарды

Желіде 10 сәуірге дейін жүргізуші куәлігін ауыстыру керек екені және сол күннен кейін куәлікті ауыстыру үшін теориялық емтихан тапсыру қажет болатыны туралы қауесет тарады. Ішкі істер министрлігі өкілдері бұл ақпаратты жоққа шығарды, деп хабарлайды KAZ.NUR.KZ.

"Ішкі істер министрлігі бұл ақпараттың шындыққа сәйкес келмейтінін ресми түрде мәлімдейді", - делінген хабарламада.

Ведомство өкілдері жүргізуші куәлігін ауыстыру үшін азаматтан талап етілетін құжаттар тізімін келтірді. Олар:

• жеке басын куәландыратын құжат немесе цифрлық құжаттар сервисі арқылы ұсынылатын электрондық құжаттар;
• мемлекеттік баж салығының төленгенін растайтын құжат.

Сондай-ақ куәліктің қолданылу мерзімі өткен жағдайда қосымша медициналық анықтама қажет.

ІІМ таратқан ақпаратқа сәйкес, жол жүру ережелері бойынша жүргізуші куәлігін ауыстырарда емтихан тапсыру талап етілмейді.