"Қауіпті ойын ойнаған": Ақтауда оқушы қыз есінен танып қалды

Ақтауда оқушы қыздар қауіпті ойын ойнап, оны видеоға түсірген. Кадрлардан қыздардың бірі есінен танып, құлаған сәтін байқауға болады. Облыстық білім басқармасы өкілдері мектепте болған жағдайға түсінік берді, деп хабарлайды KAZ.NUR.KZ.

Instagram желісіндегі quqyq_zhane_shyndyq парақшасында Ақтаудағы мектептердің бірінде әжетханада түсірілген видео жарияланды.

"Ақтау қаласында 7 сыныпта оқитын қыздар түсініксіз қауіпті ойын ойнап, оны видеоға түсірген", - делінген видео сипаттамасында.

Кадрда оқушы қызды басқа үш қыз кеудесінен басып тұрғанын, кейін оқушы есінен танып, құлағанын байқауға болады.

Бұл оқиғаға қатысты Маңғыстау облысының білім басқармасы түсінік берді. Ведомствоның баспасөз қызметінің хабарлауынша, жағдай 18 сәуірде болған.

"Бұл оқиға Ақтаудағы мектептердің біріндегі қыздар әжетханасында тіркелді. 7 сынып оқушысының кеудесін қысып, физикалық қысым көрсеткен", - деп түсіндірді ведомстводағылар.

Білім басқармасындағылардың айтуынша, жасөспірімдерге және олардың ата-аналарына профилактикалық және психологиялық жұмыстар жүргізілген.

"Сонымен қатар бұл оқиғаны Ақтау қалалық әкімдігі жанындағы кәмелетке толмағандар ісі жөніндегі арнайы комиссия қарайды", - деп атап өтті басқарманың баспасөз қызметі.

Ақтау қалалық білім бөлімі де мектеп директорына қатысты тәртіптік шара қолданған.

Мәтіннен қате тапсаңыз, бізге жазыңыз