Түркістан облысында қауын пісті

Түркістан облысы Жетісай ауданында қауын пісті. Биыл бақша дақылы жылдағыдан сәл ерте піскен. Шаруалар өнімдерін шет мемлекетке экспорттауды бастап кеткен, деп хабарлайды Түркістан облыстық әкімдігіне сілтеме жасаған KAZ.NUR.KZ.

Әкімдіктің мәліметінше, Жетісай ауданының шаруалары биыл 79,3 мың гектар суармалы жердің 43 мың гектарына мақта шитін сепсе, 16,7 мың гектар жерге бақша, 7,5 мың жерге дәндік жүгері, 3,6 мың га жерге көкөніс пен 6,7 мың гектар алқапқа малазық дақылдарын еккен. Бүгінде көкөніс дақылдарынан 36 мың тонна өнім жиналған.

Одан бөлек, егістік алқаптарда егілген қауын дақылдарының алғашқы өнімі пісіп те үлгерген.

Соңғы 15 жылдан бері диқаншылықпен айналысып келе жатқан жетісайлық шаруа Әл-Фараби Күзенбаев Ж.Ералиев ауылдық округіндегі 50 гектар жеріне қауынның "Нұр-Бакинка" және "Дампера" сорттарын ексе, 250 гектарына мақта шитін сепкен.

Қожалық төрағасы ерте көктемде отырғызған көшеттері жоспардағы 65 күнде емес, 70 күнде дайын болғанын айтады.

Енді сұранысқа сай Ресей Федерациясына 100 тонна қауынды экспорттап жатыр.

"Биыл қауынымыз жылдағыдан сәл ертелеу пісті. Сұраныс та жақсы. Ағын судан қиыншылықтар болғанымен, тапшылық сезілмеді. Алғашқы өнімдерімізді Ресейге экспорттап жатырмыз. Ешқандай делдалсыз егістік басынан өзіміз көліктерге тиеп, жіберіп жатырмыз", - дейді Әл-Фараби Күзенбаев.

Шаруа орта есеппен гектарынан 400 центнерден өнім алуды жоспарлап отыр.