Елімізде банк картасын үшінші тұлғаларға бергені үшін қылмыстық жауапкершілік енгізілді

Қазақстанда банк картасын үшінші тұлғаларға бергені үшін қылмыстық жауапкершілік енгізілді, деп хабарлайды Polisia.kz порталына сілтеме жасаған KAZ.NUR.KZ.

ІІМ-нің ресми медиапорталының жазуынша, Ішкі істер министрлігі дербес деректерді қорғауға және қаржы қызметі саласындағы қауіпсіздікті арттыруға бағытталған Қазақстан Республикасының қылмыстық заңнамасындағы маңызды өзгерістер туралы ескертеді.

"Қылмыстық кодекстің жаңа 232-1 бабында өзінің банктік деректемелерін үшінші тұлғаларға бергені үшін, сондай-ақ материалдық сыйақы немесе мүліктік сипаттағы пайда үшін немесе оларды алу мақсатында үшінші тұлғаның мүддесі үшін я болмаса пайданы көздеп, төлемдер немесе ақша аударымдарын жүзеге асырғаны үшін қылмыстық жауаптылық енгізілді", - делінген хабарламада.

ІІМ-нің мәліметінше, алаяқтар берілген деректерді қылмыстық кірістерді қолма-қол ақшаға айналдыру немесе басқа азаматтарды алдау үшін пайдаланады. Көп жағдайда зардап шеккендер өздерінің қылмысқа қатысушы екенін түсінбейді.

"Есіңізде болсын: жеке және банктік деректер жай ғана ақпарат емес, бұл сіздің мүлкіңіздің, қауіпсіздігіңіздің және заң алдындағы жауапкершілігіңіздің кілті", - деп ескертеді ІІМ өкілдері.

ІІМ еске салады:

• ешқашан банктік деректеріңізді үшінші тұлғаларға бермеңіз;
• картаңызды немесе шотыңызды беру арқылы "оңай ақша табуға" келіспеңіз;
• күдік туындаған жағдайда банкке немесе құқық қорғау органдарына хабарласыңыз.

Мәтіннен қате тапсаңыз, бізге жазыңыз