Жаяу жүргіншілер аллеясына айналады: Алматыда Пушкин көшесінің бір бөлігі жабылады

31 шілдеден бастап Алматыда Пушкин көшесінің бір бөлігі қайта жаңғырту жұмыстары жүргізу үшін жабылады. Құрылыс жұмыстары аяқталғаннан кейін бұл бөлік жаяу жүргіншілерге арналған аллеяға айналып, көлік қозғалысы үшін біржола жабылады. Бұл туралы AlmatyJoly-ға сілтеме жасаған KAZ.NUR.KZ хабарлайды.

Алматы қаласының Қоғамдық кеңістіктерді дамыту басқармасының мәліметінше, Пушкин көшесінің бойында (Райымбек батыр даңғылынан Гоголь көшесіне дейінгі аумақта) қайта жаңғырту жобасы басталған.

Осыған байланысты 31 шілдеден бастап құрылыс-монтаж жұмыстарына байланысты Пушкин көшесінің шығыс жағында (Райымбек батыр даңғылынан Мақатаев көшесіне дейін) көлік қозғалысы уақытша шектеледі.

"Жаңғырту аяқталғаннан кейін бұл бөлік жаяу жүргіншілерге арналған аллеяға айналып, көлік қозғалысы үшін біржола жабылады.

Құрылыс уақытында көлік қозғалысы Пушкин көшесінің батыс жағында оңтүстік бағытта біржақты тәртіпте ұйымдастырылады.

Аталған шектеу шаралары Алматы қаласы полиция департаменті мен Қалалық мобилділік басқармасымен келісілген", - делінген хабарламада.

Мәтіннен қате тапсаңыз, бізге жазыңыз