Қарағанды облысында із-түзсіз жоғалған 13 жастағы бала даладан табылды

Қарағанды облысында жоғалған 13 жастағы бала аман-есен табылды, деп хабарлайды KAZ.NUR.KZ.

Бұл туралы ІІМ-нің баспасөз қызметі хабарлады. Полиция мәліметінше, оның өмірі мен денсаулығына қауіп төніп тұрған жоқ.

Қарағанды облысы ТЖД өкілдерінің хабарлауынша, бүгін сағат 12:05-те мобильді топ (еріктілер) жоғалған баланы Абай қаласынан 15 км қашықтықтағы далалы жерден тапқан. Оған медициналық көмек қажет болмаған.

Алдын ала мәлімет бойынша, жасөспірім достарымен бірге Абай қаласынан Қарабас кенті бағытына жаяу шыққан. Қарабас кентіндегі теміржол өткелі маңында балалар екіге бөлініп, екі жасөспірім үйлеріне өздері қайтқан. Туыстарының айтуынша, бала соңғы рет шамамен сағат 20:00-де анасына хабарласып, бағдарынан адасып қалғанын айтқан.

Айта кету керек, баланың жоғалғаны туралы хабарлама оның соңғы байланысқа шыққан уақытынан бірнеше сағат өткен соң түскен, бұл іздестіру жұмыстарын қиындатқан.

Ауқымды іздестіру-құтқару жұмыстарына ТЖМ, ТЖМ-нің 52859 әскери бөлімі, полиция департаменті, жергілікті атқарушы органдар, сондай-ақ туыстары, волонтерлер мен жергілікті тұрғындар жұмылдырылған. Сонымен қатар, әуеден шолу жүргізу үшін ТЖМ-нің "Қазавиақұтқару" тікұшағы жұмылдырылды.

Еске сала кетейік, бұған дейін Қарағанды облысы Абай қаласында 2012 жылы туған жасөспірімнің із-түзсіз жоғалып кеткені белгілі болды.

Жасөспірім 1 сәуір күні үйінен шығып кеткен еді.

Мәтіннен қате тапсаңыз, бізге жазыңыз