Маңғыстауда ауа райының қолайсыздығынан жүздеген бас мал қырылды: фермерлер өтемақы талап етті

Малы қырылған Маңғыстау облысының фермерлері биліктен көмек сұрап, апаттан келген залал үшін өтемақы сұрап отыр, деп хабарлайды KAZ.NUR.KZ Lada.kz-ке сілтеме жасап.

Қарақия ауданының тұрғындары ең көп шығынға ұшыраған. Аудан әкімдігі ұсынған ресми мәліметтерге сәйкес, 20 сәуірде 237 бас мал арам қатты: 108 ат, 5 тай, 10 құлын, 2 түйе, 5 бота және 107 қой және ешкі. 21 сәуірде тағы 316 жануар өлді.

Жалпы фермерлер екі күнде 550-ден астам малынан айырылды.

Бұған дейін малдың жаппай қырылуына ауа райының қолайсыздығы – қатты жел мен нөсер себеп болғаны хабарланды. Бағытынан адасқан жануарлар адам аяғы жетуі қиын жерлерге тап болып, батпақты жерде арам қатты. Кей үйірлер елді мекендерден 60-80 шақырым қашықтықта қырылған болуы мүмкін.

Фермерлер енді биліктен өлген мал үшін өтемақы талап етіп, мал өлекселерін жоюға көмек сұрап отыр.

Маңғыстау облысының әкімдігі бұл жағдайға қатысты жауап берді.

Әкімдік мәліметінше, қазіргі уақытта жердің батпаққа айналуына байланысты ауданда арнайы техниканы орналастыру жұмыстары жүргізілуде. Қазіргі уақытта мал санағы жүргізіліп, тиісті актілер толтырылып жатыр.

"Актілер құрастырылып, жануарлар идентификациядан өткеннен кейін (чиптер бойынша), ветеринарлық қызметпен бірге мал өлексесі арнайы жабдықтарды пайдалану арқылы жойыла бастайды. Өлген малға өтемақы төлеу мәселесі қолданыстағы заңнама аясында қарастырылады", - деп хабарлады облыстық әкімдік.

Мәтіннен қате тапсаңыз, бізге жазыңыз