Мешітте түнеген: Астанада жоғалған жасөспірім қала сыртындағы тасжолдан табылды

Астанада 9 мамырда жоғалған жасөспірім қала маңындағы ауылдардың бірінен табылды. Ата-анасымен арадағы келіспеушілік салдарынан ол үйінен кетіп, мшітте түнеген, деп хабарлайды ІІМ ресми сайтына сілтеме жасаған KAZ.NUR.KZ.

Ведомство хабарлауынша, 9 мамыр күні полицияға кәмелетке толмаған баланың жоғалғаны туралы арыз түскен. Ата-анасы жасөспірім бір күн бұрын қосымша сабаққа кетіп, үйіне оралмаған. Кейін ол ата-анасымен түсінісе алмағандықтан, өз еркімен үйден кетіп қалғаны белгілі болған.

"Іздестіру барысында кәмелетке толмаған баланың автобуспен соңғы аялдамаға дейін барып, кейін тасжол бойымен жаяу жүргені анықталды. Жасөспірім Ақжар ауылындағы мешітте түнеп шыққан. Полицейлер жергілікті тұрғындар мен жол бойындағы жүргізушілерден жауап алып, оның әрі қарай жүрген бағытын анықтады. Нәтижесінде полицейлер жасөспірімді қала сыртындағы тасжол бойынан тауып, аман-есен ата-анасына тапсырды", - делінген хабарламада.

Оның өмірі мен денсаулығына ешқандай қауіп жоқ. Отбасымен профилактикалық әңгіме жүргізілген.

Мәтіннен қате тапсаңыз, бізге жазыңыз