Головкин World Boxing ұйымдастырған тұңғыш әлем чемпионатының ашылу салтанатына қатысты

Қазақстан Ұлттық олимпиадалық комитетінің президенті Геннадий Головкин бокстан алғаш рет өтіп жатқан U19 әлем чемпионатының ашылу салтанатына қатысты. Бұл туралы комитетке сілтеме жасаған KAZ.NUR.KZ хабарлайды.

Ұлттық олимпиадалық комитеттің ресми сайтында жарияланған мәлімет бойынша, U19 әлем чемпионаты АҚШ-тың Пуэбло қаласында өтіп жатыр.

Шарада сөз алған Геннадий Головкин әлем біріншілігінің маңызына тоқталып, бұл дода спорттағы жаңа дарындардың жұлдызын жағуға көмектесетін алаң ғана емес, сонымен бірге түрлі елден келген жас боксшылардың бірлігі мен достығының белгісіне айналатынына сенімді екенін жеткізді. 

Әлем чемпионатында 30 елден 180 спортшы қатысып жатыр. Қазақстан намысын Ерасыл Аманғалиев (55 кг-ғадейінгі салмақта), Асылхан Көшербай (65 кг-ға дейінгі салмақта), Диас Серікұлы (70 кг-ға дейінгі салмақта), Даниял Райымбеков (85 кг-ға дейінгі салмақта) қорғайды.

Алғашқы болып рингке Диас Серікұлы шықты. Ол Алжир командасының өкілі Ислам Дахлалды жеңді. 

Еске салсақ, бұған дейін Геннадий Головкин World Boxing Олимпиадалық комиссияның төрағасы қызметіне тағайындалған еді.

Мәтіннен қате тапсаңыз, бізге жазыңыз