АҚШ құрамасының шабуылшысы гол соққан сәтін Трамптың биімен тойлады (видео)

АҚШ құрамасының және "Милан" футбол клубының шабуылшысы Кристиан Пулишич Ямайкаға қарсы матчта гол соққан сәтін ерекше тойлап, көпшілікті таңдандырды. Бұл туралы KAZ.NUR.KZ хабарлайды.

КОНКАКАФ Ұлттар лигасында Ямайка құрамасын 4:2 есебімен жеңіске жеткен америкалықтар турнирдің жартылай финалына жолдама алды.

Кристиан Пулишич ойынның 13-минутында АҚШ құрамасының бұл матчтағы алғашқы голын соқты. Осы сәтте ол әлеуметтік желіде танымал болған АҚШ президенті Дональд Трамптың биін қайталап, соққан голын ерекше атап өтті.

Сондай-ақ бұл биді бұған дейін басқа да америкалық спортшылар қайталап шыққан болатын. Мысалы, NFL-де өнер көрсететін "Лас-Вегас Рейдерс" командасының ойыншысы Брок Бауэрс сәтті ұпайдан кейін дәл осы биді билесе, америкалық файтер Джон Джонс өткен демалыс күндері АҚШ-та өткен UFC кешіндегі жеңісінен кейін Трамптың көз алдында осы биді биледі.

Айта кетейік, қарашаның басында АҚШ-та президент сайлауы өтіп, нәтижесінде Дональд Трамп билік басына келген еді.

6 қарашада Дональд Трамп Флоридада жақтастары алдында сөз сөйледі. Содан кейін саясаткер Village People тобының YMCA әніне билеген болатын.