Діни үгіт-насихат жүргізуге салынған тыйым: туризм және спорт министрінің орынбасары түсініктеме берді

Қазақстанда спорттағы әдеп ережелері қайта бекіді. Бірақ онда айтарлықтай ауқымды өзгеріс жоқ. Еліміздің туризм және спорт министрінің орынбасары ережедегі өзгерістерге тоқталды, деп хабарлайды 24.kz.

Осыдан 5 жыл бұрынғы нормаға сай техникалық сипаты мен құжаттың мазмұны сол күйі сақталған. Тек терминдер нақтыланды. Сосын бұрынғы атауларға қазір басқаша анықтама беріледі. Мысалы, "ұлттық құрама команда" енді "Қазақстанның спорт түрі бойынша ұлттық құрама командасы" деп өзгертілді.

Ал "бұқаралық ақпарат құралдары" орнына "масс-медиа" термині қолданылады. Сондай-ақ "спорт төрешісі" ұғымы енгізіліп, оның өкілеті мен кәсіби талаптары айқындалған.

Дей тұрғанмен кей мәселенің мәнісін түсінбей даурығып жүргендер бар. Яғни ешкімнің діни сенім бостандығына шектеу жоқ. Тек спортта діни үгіт-насихат жүргізуге тыйым салынған.

"Нақты қағида жазылып тұр. Өзінің дінге байланысты көзқарасын басқа адамдарға насихаттап, басқа адамдарды тартуға болмайды. Неге десеңіз, себебі олимпиадалық хартияда жазылған. Ең бастысы Конституцияда жазылған. Сосын діни басқа заңдарда көзделген", - дейді туризм және спорт министрінің орынбасары Серік Жарасбаев.

Сондай-ақ құжатта спортшыларға әнұранның сөзін жатқа біліп, ырғағынан жаңылмауға тиістігі жазылған. Бұл ел азаматтығын алған спортшыларға қатысты да қатаң талап. Қорыта айтқанда, спорттағы мінез-құлық мәдениетін қалыптастыру нормалары түзілген.

Мәтіннен қате тапсаңыз, бізге жазыңыз