Бокстан әлем чемпионы Наталья Богданова да автокөлік сыйға алды (фото)

Солтүстік Қазақстан облысында бокстан әлем чемпионы Наталья Богдановамен оның бапкері Дастан Қабденовке құрмет көрсетілді, деп хабарлайды өңір әкімдігіне сілтеме жасаған KAZ.NUR.KZ.

Шараға облыс әкімі Ғауез Нұрмұхамбетов пен спорт саласының өкілдері қатысқан.

Кездесу барысында өңір басшысы Натальяны айтулы жетістігімен құттықтап, оның бапкері Дастан Қабденовке кәсіби шеберлігі мен жанкешті еңбегі үшін алғыс айтқан.

Сондай-ақ боксшыға автокөлік, ал бапкеріне 3 миллион теңгенің сертификатын табыстаған.

"Натальяның таланты, табандылығы мен жанкешті еңбегі, сондай-ақ оның жаттықтырушысы Дастан Қабденовтың кәсібилігі мен өз ісіне деген адалдығының нәтижесінде, еліміздің көк байрағы тағы да халықаралық аренада биікке көтерілді. 

Бұл жеңіс – жас спортшылар үшін үлкен үлгі әрі өңірімізде бұқаралық спортты дамытуға жаңа серпін беретін қозғаушы күш. Натальяның отбасы мен жақындарына шын жүректен алғыс айтамын! Бұл – үлкен жолдың бастауы ғана. Алда Наталья мен Дастанды әлі талай асулар күтіп тұр. Сәттілік тілеймін!" - деді өңір басшысы.

Айта кетейік, бокстан Англияның Ливерпуль қаласында өткен әлем біріншілігінде Наталья Богданова 70 келіде чемпион атанды. Ол ақтық сында австралиялық Лекейша Перголитиді жеңді.

Спорттағы жоғарғы жетістіктері үшін Наталья Богданова мен Дастан Қабденов "Құрмет" орденімен марапатталды.

Мәтіннен қате тапсаңыз, бізге жазыңыз