Танымал боксшы Жанқош Тұраров Instagram желісіне жүктеген жазбасымен өз жанкүйерлерін алаңдатып қойды. Желі оқырмандары спортшының боксты тастап, ММА-ға ауысқалы жатқанын болжады деп жазады NUR.KZ.
Көптен бері кәсіби рингке шықпай кеткен боксшы ережесіз жекпе-жектің белбеулерімен түскен суретін жариялады. Жанқош Тұраровтың бұл әрекетін желідегілер қызу талқыға салып, спортшы бокстан кететінін меңзеп тұр деп болжады.
Сондай-ақ, боксшы өзінің Stories-інде "Қай спорт түрін жақсы көресіз?" деген сауалнама жүргізген.
Сұрақтың астына бокс немесе ММА спортын таңдау мүмкіндігін қалдырған спортшы жанкүйерлерін одан әрі қызықтырып қойған.
NUR.KZ пікірталас тудырған жағдайдың анық-қанығын боксшының өзінен сұрап білді.
"Жоқ. ММА-ға ауысу мүлде ойымда жоқ. Бір жағдайларға байланысты бір жарым жылдай уақытқа бокс тоқтап қалды. Алайда, жақын арада Алла қаласа мансабымды қолға алмақпын. АҚШ-қа жол жүріп, келіссөздер бастаймыз. Сол кезде кіммен, қашан және қайда жұдырықтасатыным белгілі болады" , - дейді Жанқош Тұраров.
Айта кетейік, Жанқош Тұраров өзінің кәсіпқой бокстағы соңғы жекпе-жегін 2017 жылдың қыркүйек айында өткізген болатын.
Осы орайда, ел арасында бір жарым жылға жуық уақыт жұдырықтаспаған боксшы мансабын аяқтамақ деген қауесеттер де тараған.
Мақаланың түпнұсқасы: https://kaz.nur.kz/sport/boxing/1773279-zankos-trarov-boksty-tastap-erezesiz-zekpe-zekke-auysa-ma/
