Таиланд астанасы Бангкок қаласында 22 жасқа дейінгілер арасында өтіп жатқан Азия чемпионатында қазақстандық Санжар Тәшкенбай жеңімпаз атанды, деп хабарлайды KAZ.NUR.KZ тілшісі.
48 келіге дейін салмақта ел намысын қорғаған отандық былғары қолғап шебері финалда Өзбекстан өкілі Шодиержон Меликузиевпен жұдырықтасты.
Үш раундта да жоғарғы деңгейде өнер көрсеткен Санжар Тәшкенбай төрешілердің шешімімен кездесудің жеңімпазы атанды.
Осылайша, Санжар Тәшкенбай 22 жасқа дейінгілер арасында өтіп жатқан Азия чемпионатының алтын жүлдесін жеңіп алды.
Еске сала кетейік, бүгін Санжар Тәшкенбайдан бөлек Нұрсұлтан Алтынбек (54 келі), Махмұд Сабырхан (57 келі), Абзал Серік (67 келі), Сабыржан Аққалыков (71 келі) және Диас Молжігітов (75 келі) шаршы алаңға шығады.
Мақаланың түпнұсқасы: https://kaz.nur.kz/sport/boxing/2006882-bokstan-aziya-birinsiligi-sanzar-taskenbai-finalda-ozbek-bokssysyn-utty/
