Мәдениет және спорт министрі Бейбіт Шүменовтің әрекетіне байланысты пікір білдірді

Мәдениет және спорт министрі Асхат Оралов кәсіпқой боксшы Бейбіт Шүменовтің айналасындағы шуға байланысты пікір білдірді, деп хабарлайды ҚазАқпарат.

"Шүменов туралы мынаны айтамын, қазір құқық қорғау органдары айналысып жатыр. Ішкі істер министрлігі пікір білдіріп те қойды. Ресми қорытындыдан кейін қосымша түсінік білдіре аламыз. Ол іс қазір құқықтық алаңда қаралып жатыр. Осыған байланысты бірнеше баспасөз хабарламасы да шықты", - деді Асхат Оралов.

Осы орайда министр заң алдында бүкіл қазақстандықтың құқығы мен міндеті бірдей екенін еске салды.

"Бұл - құқықтық алаң, әр адам кәсібіне, қызметіне қарамастан, өз сөзі мен әрекеті үшін жауап береді, оның үстіне жеке өмірі болса. Сондықтан ол өз әрекеті үшін құқықтық алаңда жауап береді", - деді Асхат Оралов.

Айта кетсек, осыған дейін боксшы Бейбіт Шүменов 2 күннен бері іздестіріліп жатқанын хабарлаған едік.

Астанададағы сауда орталығында бокстан бұрынғы әлем чемпионы Бейбіт Шүменов қолында баласы бар адамды ұрып-соққанын жазған едік. Бұл ақпаратты Ішкі істер министрінің орынбасары Қайрат Сұнтаев растады.

Кейін боксшы Бейбіт Шүменов балалы ер адаммен не үшін төбелесіп қалғанын айтып, жағдайға қатысты мәлімдеме жасаған болатын.

Сонымен қатар еліміздің Бала құқықтары жөніндегі уәкілі Динара Зәкиева балалы ер адамды ұрған Бейбіт Шүменовті тағы бір бап бойынша жауапқа тартуды ұсынған еді.

Одан бөлек, ІІМ Астананың сауда орталығында болған Бейбіт Шүменовтің төбелесіне қатысты қылмыстық іс қозғағанын жазған едік.

Мәтіннен қате тапсаңыз, бізге жазыңыз