Қытайдың Ханчжоу қаласында өтетін жазғы Азия ойындарына қатысатын бокстан Қазақстан ерлер құрамасының тізімі жарияланды. Бұл туралы федерация Instagram-дағы ресми парақшасында хабарлады.
Бокс федерациясының мәліметінше, жазғы Азия ойындарында ел намысын жеті боксшы қорғайды.
Бокстан Қазақстан ерлер құрамасы тізімі:
- Сәкен Бибосынов (51 келіге дейін);
- Махмұд Сабырхан (57 келіге дейін);
- Ертуған Зейнуллинов (63,5 келіге дейін);
- Асланбек Шымбергенов (71 келіге дейін);
- Нұрбек Оралбай (80 келіге дейін);
- Сағындық Тоғамбай (92 келіге дейін);
- Қамшыбек Қоңқабаев (92 келіден жоғары).
"Мырзағали Айтжановтың бапкерлер штабы Қытай рингіне мықтының мықтысын алып шығады. Олардың кейбіреулері Ташкентте өткен біз үшін тарихи әлем чемпионатынан кейін, басқалары Астана-2023 халықаралық Elorda Cup турнирінің қорытындысы бойынша бәсекеге қатысуға мүмкіндік алды", - делінген федерация хабарламасында.
Айта кетейік, Азия ойындары биыл 23 қыркүйек пен 8 қазан аралығында Қытайдың Ханчжоу қаласында өтеді. Қазақстан туын боксшы Асланбек Шымбергенов пен жеңіл атлет Надежда Дубовицкая алып шығады. Бұл додада жалпы жиынтығы 40 медаль сарапқа салынады.
Мақаланың түпнұсқасы: https://kaz.nur.kz/sport/boxing/2033969-bokstan-aziya-oiyndaryna-qatysatyn-qazaqstan-erler-quramasynyn-tizimi-belgili-boldy/
