Қазақстандық боксшы Бекзад Нұрдәулетов IBA ұйымдастыратын "Чемпиондар түні" бокс кешінде өнер көрсетеді. Бұл туралы KAZ.NUR.KZ "Адал" кәсіби бокс промоушенінің Instagram-дағы ресми парақшасына сілтеме жасап хабарлайды.
2019 жылы өткен әуесқой боксшылар арасындағы әлем чемпионатының жеңімпазы Бекзад Нұрдәулетов (6-0 2 КО) Халықаралық бокс ассоциациясы (IBA) ұйымдастыратын "Чемпиондар түнінде" жұдырықтасады. Кәсіби бокс кеші 15-желтоқсан Астана қаласында өтеді.
Бекзад Нұрдәулетовтің қарсыласы – ресейлік былғары қолғап шебері Никита Зонь. Жекпе-жек 80 келі салмақ дәрежесінде өтеді. Спортшылар 3 минуттан тұратын 6 раунд жұдырықтасады.
Айта кетейік, Бекзад Нұрдәулетовтің кәсіби бокстағы соңғы жекпе-жегі 2022 жылы өтті. Бекзад Польшадағы жекпе-жек кешінде грузиялық Яго Кизирияға қарсы жұдырықтасты. 8 раундтың нәтижесі бойынша төрешілер шешімімен қазақстандық спортшы жеңіске жеткен еді.
Мақаланың түпнұсқасы: https://kaz.nur.kz/sport/boxing/2049600-alem-cempiony-bekzad-nurdauletovtyn-kasibi-bokstagy-kelesi-zekpe-zegi-belgilendi/
