Санжар Тәшкенбай бастаған қазақстандық боксшылар халықаралық турнирге қатысады

2-12 ақпан аралығында Болгария астанасы Софияда бокстан "Странджа" турнирі өтеді. Жарысқа Қазақстан құрамасы да қатысады. Бұл туралы KAZ.NUR.KZ Ұлттық Олимпиада комитетінің ресми сайтына сілтеме жасап хабарлайды.

"Странджа" турнирінде Қазақстан намысын қорғайтын боксшылардың ішінде әлем чемпионы Санжар Тәшкенбай (51 келі) бар. Одан бөлек Дәулет Молдашев (54 келі), Оразбек Асылқұлов (57 келі), Руслан Күзеубаев (60 келі), Ерасыл Танкай (63,5 келі), Дулат Бекбауов (67 келі), Талғат Шәйкен (71 келі), Нұрқанат Райыс (75 келі), Тұрсынбай Құлахмет (80 келі), Абзал Құттыбеков (86 келі), Сағындык Тоғамбай (92 келі) сынды былғары қолғап шеберлері аталған турнирде бақ сынайды.

Бас бапкер Мырзағали Айтжановтың айтуынша, жарыс басталғанға дейін құрамда аз-кем өзгеріс болуы мүмкін. 

Айта кетейік, "Странджа" кубогы – Болгарияда жыл сайын өтетін халықаралық әуесқой бокс турнирі. Ол алғаш рет 1950 жылы Софиядағы "Юнак" стадионында өткен еді. Биыл 75-рет ұйымдастырғалы отыр.

Посмотреть эту публикацию в Instagram

Публикация от Instagram

Мәтіннен қате тапсаңыз, бізге жазыңыз